Turkiyaning Oydin viloyati hududida joylashgan qadimiy Tralleys shahrida olib borilayotgan arxeologik qazishmalar navbatdagi shov-shuvli kashfiyotni taqdim etdi. Arxeologlar tomonidan olib borilgan izlanishlar natijasida antik davrga oid noyob va ulugʻvor havuz inshooti aniqlandi.

Mutaxassislarning taʼkidlashicha, ushbu monumental arxitektura obidasi taxminan ikki ming yillik tarixga ega. Inshoot oʻzining munosib koʻlami va muhandislik yechimi bilan mutaxassislarni hayratda qoldirmoqda. Qadimiy meʼmorchilik sanʼatining yorqin namunasi boʻlmish ushbu inshoot bir vaqtning oʻzida 300 nafarga yaqin odamni oʻz bagʻriga sigʻdira olgan. Bu koʻrsatkich antik davr gidrotexnika inshootlari va jamoat maskanlari uchun juda yuqori natija hisoblanadi.

Olimlarning fikricha, Tralleys shahridagi bu majmua oʻz zamonasida nafaqat choʻmilish va hordiq chiqarish, balki yirik sport musobaqalari, jismoniy mashqlar hamda atletlar tayyorgarligi uchun xizmat qilgan noyob sport markazlaridan biri boʻlgan. Shu sababli ham kashfiyot madaniy va tarixiy jihatdan yuqori qiymatga ega deb baholanmoqda.

Hozirgi kunda tarixiy obidada keng koʻlamli ilmiy tadqiqotlar hamda restavratsiya ishlari jadal surʼatlarda davom ettirilmoqda. Arxeologlar taʼkidlashicha, ushbu tarixiy topilmani tiklash hamda mustahkamlash bosqichlari toʻliq yakunlangach, ushbu qadimiy inshoot oʻzining dastlabki qiyofasiga qaytariladi va hamda havuz qayta suv bilan toʻldirilib, madaniy meros obyekti sifatida sayyohlar uchun oʻz eshiklarini ochadi.