Professional boksning super o‘rta vazn toifasida harakat qilayotgan Bektemir Meliqo‘ziev 14 dekabr, shanba kuni AQShda bo‘lib o‘tgan boks kechasida Von Aleksanderga qarshi ringga ko‘tarildi, deb xabar berdi olamsport.

Kaliforniyadagi "Fantasy Springs Casino" arenasida tashkil etilgan mazkur jangda hamyurtimizga amerikalik Vaugin Aleksander raqiblik qildi. Hamyurtimiz jangning asosiy qismida tashabbusga ega bo‘ldi. Ammo raqib ham anoyilardan emasdi. 10 raundga mo‘ljallangan jang to‘liq davom etdi. G‘olib ochkolar hisobiga ko‘ra aniqlandi. Jang yakuniga ko‘ra hakamlar bir ovozdan Bektemirning 100:90, 100:90, 100:90 hisoblaridagi g‘alabasini qayd etishdi.

Shu tariqa, Meliqo‘ziev professional boksdagi 4-jangida o‘zining 4-g‘alabasini qo‘lga kiritdi. U bundan oldingi uchta jangida nokaut evaziga raqiblarini taslim etgandi.

Mazkur g‘alaba orqali Bektemir "WBA Continental Americas" kamari sohibiga aylandi.